Enlace a Google Maps
La parroquia de Nembra encuéntrase en la zona centro-sur de Asturias, dentro del Conceyu de Aller.
Pa tchegar aquí, en la autopista Oviedo-Campomanes, desviamonos a la altura de Ujo en dirección Moreda-Puerto de San Isidro. A los 6 kilómetros de la desviación, en Moreda, cogemos a la derecha la carretera de Samtibáñez. Aproximadamente a 4 kilómetros tamos en Nembra
El territoriu de Nembra tá arrodieu de varies parroquies: pel este, voltiando Boyes y Tchago, quea Cabanaquinta; pel sureste, ríu arriba, un poconín pasao Escrita, ta Muries; pel oeste, voltiando la Caba, quea Congostines de Lena; pel noroeste, ríu abaxo, paséu el Faeo y el puente La Campueta, la parroquia de Morea; y pel norte, voltiando la Cotxá los Eros y la Buariza, Piñeres. Anque agora cuenten Corigos y Soto, pa nosotros ye ibual que siempre: Soto ye de Cabanaquinta y Corigos de Piñeres.
Los montes estreman bien estremao lo que ye Nembra y lo que son les parroquies que quean pal utru tcheu: Piñeres, Cabanaquinta y Congostines. Ríu arriba y ríu abaxo los cuélebres y los diosinos, escondíos per ente les peñes y los munchos árboles, yeran los que se encargaban de marcar los tchindieros de la parroquia, metiéndoyos mieo a los que trataban de pasar del terrinu de un puiblu pa utru. Tavía nisti tiipu que corremos hay más de un que aborrez pasar de nuitche pel tcheu el Faeo o per Escrita, ni en que sea en coche; cuantes y más si tuviera que dir a pie. Ye curioso oyer que dalgunos vecinos vieron ovnis pa riba Escrita y pal Faeo. ¿Habrá daquién que siga curiando les entraes a los bosques sagraos? ¿Nun serán les ánimes de los antepasaos que nun quieren apartase de los sitios onde se atopan bien, y se sienten incomalo de que nun los dexen tranquilos na so tierrina?